Description of Nava Durga Avatar of Shri Adi Shakti

నవదుర్గామ్‌ నమోస్తుతే!

అమ్మలగన్నయమ్మ దుర్గమ్మ. నవరాత్రుల్లో అమ్మవారిని రోజుకొక రూపంతో పూజించే సంప్రదాయం - ఆచారం ఉంది. ఈ తొమ్మిది రోజులూ పూజించే దుర్గాదేవి రూపాలను ‘నవదుర్గలు’ అంటారు. ఈ నవరాత్రార్చనలో తొమ్మిది రాత్రులు దేవిని పూజిస్తే సంవత్సరమంతా పూజించిన ఫలం లభిస్తుందని పెద్దల మాట.

1. శైల పుత్రి*

పరమ శివుని వివాహమాడిన పర్వతరాజ పుత్రి పార్వతి. శైల పుత్రి. ఈమె వృషభవాహిని. కుడిచేతిలో త్రిశూలం, ఎడమ చేతిలో కమలం ఉంటాయి.

2 బ్రహ్మచారిణి*

పార్వతి శివుని భర్తగా పొందడానికి బ్రహ్మచర్య దీక్షతో కఠిన తపస్సు చేసినందున ‘బ్రహ్మచారిణి’ అనేపేరు వచ్చింది.

3. చంద్రఘంట*

శిరసున దాల్చిన అర్ధ చంద్రుడు ఘంటాకృతిలో ఉండడం వల్ల ఈ దేవికి ‘‘చంద్రఘంట’’ అనేపేరు ఏర్పడింది.

4. కూష్మాండ*

బ్రహ్మాండాన్ని సృష్టించినది కనుక ఆమెకు ‘కూష్మాండ’ అనే పేరు వచ్చింది. సూర్యుడిలో ఉండి జగత్తుకు వెలుగునిస్తుంది.

5. స్కందమాత*

స్కందుడు అంటే కుమారస్వామి. ఆయన తల్లి పార్వతి దేవి అంటే ‘స్కందమాత’. ఆమె ఒడిలో స్కందుడు ఉంటాడు.

6. కాత్యాయని*

కాత్యాయన మహర్షి కుమార్తెగా జన్మించిన దుర్గావతారం. శ్రీకృష్ణుని పతిగా పొందాలని, గోపికలు అమ్మవారిని ఆరాధించిన రూపం ఇది.

7. కాళరాత్రి*

ఈ రూపంలో దేవి శరీరం చీకటిలా నల్లగా ఉంటుంది. అందుకే ‘కాళరాత్రి’ అని పేరు వచ్చింది. భయంకర రూపిణి. అయినా శుభకరి.

8. మహాగౌరి*

తెల్లని మేని చాయతో తెల్లని వస్త్రాభరణాలు ధరించిన పార్వతీ రూపమే మహాగౌరి. ఆమె వృషభ వాహిని.

9. సిద్ధిధాత్రి*

దేవి చివరి రూపం సిద్ధి ధాత్రి. అన్ని రకాల సిద్ధులను ఇచ్చేది కాబట్టి ఆమె ‘సిద్ధిధాత్రి’ అయింది.