short story - part - 4

అలా ప్రయత్నాలు చేసి , చేసి విసిగి పోయిన రత్నాచార్యుడు  ఇంటికి చేరుకుంటున్నాడు .  ఇంతలో ఇంటిలోనుండి ఏవో అరుపులు పెద్దగా వినిపిస్తున్నాయి .  దానితో ఆందోళన చెంది కంగారుగా పరుగున వచ్చి లోనికి చూసాడు .  అతని భార్యా , కుమార్తె  లోపల గదిలో తలుపులు వేసుకుని ఉన్నారు . రాజకుమారుడు రాజేంద్ర ఎదురుగా ఒక పెద్ద పులి నిలబడి ఉంది .  ఎప్పుడూ ఏదో ఆలోచిస్తూ , వెర్రి చూపులు చూసే రాజేంద్ర పులిని చూసిన హతాత్పరినామం తో అటూ ఇటూ ఆయుధం కోసం వెతకసాగాడు .   రత్నాచార్యుడు రాజేంద్ర ఏమి చేస్తాడా అని చూస్తున్నాడు .  కానీ అతనికి కూడా భయం గానే ఉంది .  ఎందుకంటే రాజేంద్ర కు ఏమి విద్యలు వచ్చో  పూర్తిగా తెలియదు .  అందుకే తన దగ్గర ఉన్న బాకు తీసుకుని సిద్ధం గా ఉన్నాడు ఆ పులిపై విసరటానికి .  కానీ ఇంతలో రాజేంద్ర అటూ ఇటూ చూసి అక్కడ  అన్నం ఉడుకుతున్న పొయ్యిని చూసాడు .  వెంటనే వేగం గా ఆ పొయ్యి లోని మండుతున్న కట్టెను తీసుకుని పులికి చూపించాడు .  దానితో దాని ముందుకు వచ్చి ఆ మంటను చూపి దడిపించసాగాడు .  ఆ మంటను చూసి భయపడి పులి అడవి లోకి పారిపోయింది .  ఆ విషయం చూసి వైద్యుడు చాలా ఆనందించాడు .  ఇంతలో ఈ కదలికల కారణంగా అలిసిన రాజేంద్ర కళ్ళు తిరిగి కింద పడ్డాడు .  వెంటనే వైద్యుడు , ఇంట్లో ఉన్న అతని భార్య , కూతురు గబగబా అతని దగ్గరకు వచ్చారు .  వైద్యుడు అతని ముఖం పై నీరు చల్లి అతనికి స్పృహ రప్పించాడు .  స్పృహ వచ్చిన రాజేంద్ర వైద్యుడిని చూసి " ఆచార్యా !  మీరు ఎవరు ?  నేను ఇక్కడ ఎందుకు వున్నాను ?  నన్ను పొడిచిన మంత్రి  కుమారుడు ఏమయ్యాడు " అని ప్రశ్నించాడు రాజేంద్ర మాటలు విన్న వైద్యుడు "కుమారా ! నువ్వు కోలుకున్నవా ?  నీ ఆరోగ్యం గురించి నేను చాలా ఆందోళన పడ్డాను .  నువ్వు ఆ భగవంతుని దయ తో మామూలు స్థితి కి చేరుకున్నావు . " అంటూ ఆనంద భాష్పాలు తో రాజేంద్రను హత్తుకున్నాడు .  అతనికి జరిగిన విషయం అంతా వివరంగా చెప్పాడు రత్నాచార్యుడు.  " ఇన్నాళ్ళూ మా కుటుంబం అంతా నీ సేవ లోనే ఉన్నాము .  ఈమె నా భార్య సౌదామిని , ఇదిగో ఈమె నా కుమార్తె గిరిజా రత్న తిలక . అని పరిచయం చేసాడు  వైద్యుడు .  యువరాజు కు తెలివి వచ్చి అంతా మాములుగా మాట్లాడుతున్నాడు అని ఆనంద పడింది గిరిజ .  అతని వంక సూటిగా చూడలేక సిగ్గు తో ముడుచుకు పోయింది మొగ్గలా .  ఆమెను చూసి రాజేంద్ర చాలా ఆశ్చర్య పోయాడు ఆమె అందానికి ముగ్ధుడై పోయాడు .  ఇంత అందాల రాసిని నేను ఎక్కడా చూడలేదు .  అని ఏవో ఊహల్లో మునిగిపోయాడు రాజేంద్ర . 
   ఇంతలో "  కుమారా ! నీకు గతం గుర్తు వచ్చింది కదా !  నీ తండ్రి గారు ఎవరూ ?  మీ రాజ్యం ఎక్కడా ?  మీ తండ్రి గారి నామధేయం ఏమిటి ?  అసలు ఏమి జరిగిందో వివరం గా చెప్పగలవా ?" అని ప్రశ్నించాడు వైద్యుడు .